Ներառական կրթության ոլորտում մեր կրթահամալիրը կարծես ամենահայտնի ուսումնական հաստատությունն է։ Կրթության առանձնահատուկ պայմանների կարիք ունեցող սովորողների ծնողները ձգտում են իրենց երեխային տեսնել կրթահամալիրի մթնոլորտում:
Կրթահամալիրի ներառականության մասնագիտական թիմը իր աջակցությունն է ցույց տալիս կրթության առանձնահատուկ պայմանների կարիք ունեցող սովորողներին, ըստ որի իրականացվում են հետևյալ գործառույթները՝
- Կազմակերպվում է սովորողի առանձնահատկությունների գնահատում
- Ծնողի, դպրոցի ղեկավարի, կազմակերպիչների և դասավանդողների հետ համագործակցության միջոցով կազմվում է սովորողի անհատական ուսումնական պլանը
- Ըստ գնահատման եզրակացության սովորողը ստանում է հատուկ մասնագիտական աջակցություն (լոգոպեդ, հատուկ մանկավարժ, հոգեբան և այլն)
- Մասնագետ-դասավանդող համագործակցության կազմակերպվում է սովորողի արդյունավետ ներառումը միջավայրում
Մասնագիտական աջակցության կազմակերպումը իրականացվում է ծնողի հետ խորհրդակցության և իր կողմից ընտրված ձևով՝
- Ֆիզիկական միջավայրում
- Հեռավար
- Առցանց
Որպես կրթահամալիրի ներառականության թիմի մասնագետ աջակցում եմ Արևելյան, Արևմտյան դպրոց-պարտեզների, Միջին և Ավագ դպրոցի հատուկ կարիքով սովորողներին:
Գործունեությունս կազմակերպվում է ըստ անհատական աշխատաժամանակի:
Յուրաքանչյուր մասնագետ ունի իր մոտեցումն ու մեթոդները: Իմ մոտեցումն է օգտագործել սովորողի ուժեղ կողմերն ու ինչու չէ սիրելի զբաղմունքը սովորողի հետ կոնտակտ ստեղծելու և հետադարձ կապ ստանալու համար: Օգտագործելով սովորողի ուժեղ կողմերն ու սիրելի զբաղմունքները կարողանում եմ կենտրոնացնել ուշադրությունը իրականացվող աշխատանքի վրա և լուծել խնդիրները:
Աշխատանքային գործիքները երբեք շատ չեն լինում: Ամեն անգամ կարիք է լինում նոր, յուրահատուկ և ավելի արդյունավետ գործիք ունենալու: Դա ինձ մղում է անընդհատ փնտրտուքներ կատարել, մշակել, փոփոխել, ստեղծել…
Բլոգում տեղադրված նյութերն օգնում են միշտ քեզ հետ ունենալ դրանք և եթե կարիք լինի բացել և օգտագործել, ուստի Զարգացնող աշխատանքներ բաժինը միշտ ինձ հետ է: Ստեղծել եմ նաև Զարգացնող տետրակ, որը պիտանի կլինի բոլորի համար:
Իսկ սովորողների հետ կատարվող աշխատանքները համակարգվում են Անհատական աշխատանքներ բաժնում:
Պետք է նշեմ նաև, որ բացի հատուկ կարիքով սովորողներից լինում են նաև սովորողներ, որոնց հետ ևս կարիք է լինում հոգեբանական անհատական աշխատանքի: Օրինակ՝ կրտսեր դպրոցներում տարիքային վախերի հաղթահարմանն ուղղված աշխատանքներ, ներառման կարիք ունեցող սովորողներ, իսկ ավագ դպրոցում չափահասության կյանքի շեմին գտնվող սովորողների հետ անհատական հոգեբանական խորհրդատվություններ:
Սուսաննա Չալիկյանի բլոգ 